ស្អាតមិនបាច់ចំណាយច្រើន!

Posted by : Unknown Wednesday, December 26, 2012

រូបរាងជាកត្តាដ៏ចម្បងមួយដើម្បីទាក់ទាញនូវចំណាប់អារម្មណ៍ពី មនុស្សជុំវិញខ្លួន ដូច្នេះលោកអ្នកតែងខ្វាយខ្វល់និងយកចិត្តទុកដាក់ចំពោះចំណុចនេះ។
អ្នកខ្លះស្វែងរកមធ្យោបាយកែខៃផ្សេងៗ ដើម្បីប៉ះប៉ូវចំណុចខ្វះខាតបើទោះជាដឹងថាវិធីមួយចំនួនអាចប្រឈមនឹង គ្រោះថ្នាក់ដល់សុខភាពយ៉ាងណាក៏ដោយ។
ក្រៅពីប្រឈមនឹងគ្រោះថ្នាក់អ្នករកសេវាកម្មកែសម្ផស្សទាំងនោះក៏ ប្រឈមនឹងការចំណាយយ៉ាងខ្ពស់កប់ក្ដោងផងដែរ។ វិធីងាយៗដែលជួយឲ្យអ្នកមើលទៅស្រស់ស្អាត ដោយពុំចំណាយច្រើនទៀតផង។
សូមអានការណែនាំដូចខាងក្រោម៖
១. គេងឲ្យបានគ្រប់គ្រាន់១០ម៉ោង ក្នុងមួយថ្ងៃ។ ការគេងបានគ្រប់គ្រាន់ធ្វើឲ្យរាងកាយនិងខួរក្បាលមានភាពស្រស់ស្រាយ និងរឹងមាំ ដូច្នេះទឹកមុខរបស់អ្នកក៏ស្រស់ស្រាយដូចគ្នា។ ផ្ទុយទៅវិញ បើសិនអ្នកគេងមិនបានគ្រប់គ្រាន់នឹងធ្វើឲ្យខួរក្បាលចុះខ្សោយ គិតយឺត ខ្មៅក្រោមភ្នែក និងមានទឹកមុខស្លេកស្លាំងជាដើម។
២. ឈរឲ្យបានត្រង់ខ្លួន។ នៅពេលដែលអ្នកឈរបានត្រង់ដងខ្លួននឹងធ្វើឲ្យអ្នកមើលទៅមានរាងស្វែល ហើយការធ្វើបែបនេះក៏នឹងជួយបង្កើនជំនឿចិត្តលើខ្លួនឯងដែរ។ ត្រូវប្រុងប្រយ័ត្នចំពោះការពត់ពែនកោងខ្លួនរបស់អ្នកត្រូវព្យាយាម កែតម្រូវរហូតដល់ក្លាយជាទម្លាប់។
៣. កែប្រែទម្លាប់លុបលាងមុខ។ ប្រសិនបើអ្នកធ្លាប់លុបលាងមុខដោយប្រើការត្រដុសខ្លាំងៗ ឥឡូវងាកមកប្រើកន្សែងទន់ត្រដុសថ្នមៗវិញ ដែលនេះនឹងធ្វើឲ្យមានការប្រសើរជាងមុនមិនខាន។
៤. ញ៉ាំទឹកឲ្យបានច្រើន។ លោកអ្នកគួរញ៉ាំទឹកឲ្យបានយ៉ាងហោចណាស់២លីត្រក្នុងមួយថ្ងៃ។ ការញ៉ាំទឹកច្រើននេះជួយរក្សាសំណើមក្នុងរាយកាយនិងផ្ដល់ឋាមពល។
៥. ញ៉ាំផ្លែឈើឲ្យបានច្រើន។ ផ្លែឈើជាប្រភពនៃសារធាតុបំប៉នដែលជួយឲ្យអ្នកអ្នកមើលទៅក្មេងជាង វ័យ និងជួយទប់ស្កាត់ភាពជ្រីវជ្រួញ។
៦. ប្រើប្រាស់ទឹកអប់ជំនួយ។ លោកអ្នកគួរប្រើប្រាស់ទឹកអប់ដែលមានក្លិនផ្លែឈើ ឬក្លិនផ្កា ព្រោះជាទូទៅទាំងបុរសនិងនារីមានភាពទាក់ទាញនឹងក្លិនក្រអូបដែល នៅជាប់ខ្លួនរបស់អ្នក។ ប៉ុន្តែគួរជៀសវាងទឹកអប់ដែលមានក្លិនខ្លាំងដែលធ្វើឲ្យអ្នកដទៃ វាយតម្លៃថា អ្នកមិនចេះប្រើប្រាស់ទឹកអប់។
៧. ស្លៀកពាក់ឲ្យបានស្អាត។ សំលៀកបំពាក់ជាគ្រឿងតុបតែងចម្បងដែលជួយបង្កើនសម្រស់រាងកាយ។ អ្នកគួរស្លៀកសំលៀកបំពាក់ណាដែលអ៊ុតបានរៀបរយ និងតម្រូវតាមរាងកាយអ្នកសំលៀកបំពាក់ប្រភេទនេះនឹងជួយលើកសម្រស់ អ្នកឲ្យមើលទៅក្មេង និងស្រស់ស្អាតជាងមុន។